Logifem, yon sant ebèjman pou fanm ki nan difikilte

Si ou gen difikilte epi w ap chache yon lojman ak sipò pou fè fas ak sa, pa ezite rele nou nan 514-939-3172.

Kisa Logifem ye ?

Logifem ofri ebèjman ak sipò pou fanm ki genyen oswa ki pa genyen timoun nan Montréal.
Rezidans prensipal nou an genyen 14 chanm prive pou fanm ak sis chanm ki pi gwo pou mete fanm ki gen timoun yo. Genyen douch tou ak espas ki pataje ak lòt. Dire maksimòm sejou a se yon lane.

Nou genyen tou 13 apatman tranzisyon, epi genyen sis ladan yo ki rezève pou fanm monoparantal. Dire sejou maksimòm nan se twa lane. Fanm yo peye 25% nan revni yo pou lwaye a e yo dwe gen yon pwojè pou yo entegre nan sosyete a ankò, li kapab se yon pwojè pwofesyonèl oswa pou retounen ale etidye. Nòmalman, yo dwe pase nan premye rezidans la pou yo ka gen aksè a yon apatman.

Pou kilès ?

Logifem aksepte tout fanm kèlkeswa difikilte yo, estati yo, orijin yo oswa lang yo pale. Sepandan, yo dwe reponn ak kritè sa yo :

• Yo dwe gen laj 18 pou rive 65 lane
• Yo dwe nan bon kondisyon fizik pou itilize eskalye yo pou rive nan twazyèm etaj epi fè divès travay yo mande rezidan yo pou akonpli chak semèn : lave veso, netwaye douch, etc.
• Yo dwe kapab bay kotizasyon chak mwa a pou kouvri depans manje, pou gen aksè nan machin lesiv la, machin pou seche a, televizyon ak òdinatè a, ki se :
  • 400 $ pou yon chanm endividyèl
  • 50 $ pou chak timoun ki gen plis pase 6 mwa
  • (Genyen posiblite pou nou fè yon antant pèman avèk ou si ou ta gen pwoblèm
    finansye ki tanporè. Ou kapab pale ak entèvenan nan respesyon an sou sitiyasyon w ap viv la)
• Nan ka ou ta gen pwoblèm nan kesyon depandans dwòg oswa alkòl, fè yon swivi/terapi
• Pran tout medikaman yo jan yo preskri ou yo (ou dwe konsève medikaman yo nan biwo entèvansyon an)
• Ou dwe dispoze pou entèvenan an ka fè yon swivi sikososyal pou ou
• Ou dwe angaje ou pou respekte prensip kay la
• Ou dwe genyen timoun ki genyen 12 lane oswa mwens ke sa

Nou eseye kominike sa ki esansyèl bay fanm ki ebèje yo kèlkeswa lang yo pale e nou kapab fè apèl ak entèprèt si sa nesesè. Sepandan, nou pwomèt sèlman sèvis an anglè ak fransè. Gen kèk nan entèvenan yo ki pale lòt lang (kreyòl, arab, panyòl, italyen, lengala).

Kòman nou ede ?

Logifem kapab ede ou si ou nan yon sitiyasyon difisil lè li ofri ou yon kote ki an sekirite pou ou viv, yon chanm prive, twa repa chak jou ak twa kolasyon, yon espas ki rezève pou lesiv ak aksè avèk entènèt.

Anplis satisfaksyon bezwen materyèl ou yo, Logifem ofri yon swivi sikososyal pou tout fanm ki ebèje yo. Lè ou fèk rive, yon entèvenan sikososyal ap resevwa ou e l ap sipòte ou ak akonpaye ou pandan tout dire sejou ou a. Chak semèn, w ap genyen yon rankont k ap dire 45 minit konsa ak entèvenan sa a. L ap eseye sipòte ou pou kapab atenn objektif ou yo ke ou menm te idantifye poukont ou. Èd sa ka vle di se yon ekout atantiv, sipò, enfòmasyon, akonpayman pou kèk demach ak mwayen pou jwenn lòt resous itil.

Temwayaj yon rezidan : « Ak Logifem, yo ede ou e yo montre ou ke lavi a bèl e nou la pou nou avanse, pa retounen nan pase oswa pwoblèm yo. Si nou la, se pou nou bliye yo, epi regle sa youn pa youn nan tout trankilite, men ak sètitid ».

Ki kote ?

Logifem se yon sant ebèjman ki nan Sidwès Montréal tou prè yon estasyon tren. Nou pa bay adrès la sou sit wèb la pou kesyon sekirite lokal yo. Yo kominike fanm nan lokal egzat la lè yon aksepte li nan pwogram nan.

Ki etap ou dwe swiv pou ou rete ladan li ?

1. Rele Logifem nan 514-939-3172. Nou ouvri 24 sou 24 ak 7 jou sou 7. N ap envite ou nan pwochèn seyans enfòmasyon an. Si ou bezwen yon lojman imedyatman, n ap kapab gide ou pou jwenn resous ki apwopriye a.
2. Patisipe nan rankont enfòmasyon an : Si ou swete pase yon sejou nan Logifem, vini patisipe nan yon seyans enfòmasyon, li fèt jeneralman nan madi aprè midi, pou ka konnen plis sou sèvis n ap ofri a. Aprè sa, fanm ki entèrese ak Logifem yo, kapab ranpli yon fòmilè aplikasyon annapre epi diskite sou sitiyasyon yo ak entèvenan nou an k ap resevwa yo a.
3. Rete an kontak : Aprè sa, ekip travay la ap asire li ke Logifem se bon resous la pou ou. Sa ka rive ou rete tann yon ti moman anvan gen yon chanm ki vini disponib (sa ka pran kèk jou oswa kèk mwa). Li enpòtan pou ou rele chak semèn pou montre ke ou toujou entèrese. Entèvenan nan resepsyon an ap kontakte ou lè gen chanm ki disponib e l ap diskite avèk ou sou detay yo.

Pou konbyen tan ?

Ou kapab rete nan sant ebèjman an jiska yon lane.

Nou genyen apatman tranzisyonèl tou, nou ofri yo bay fanm ki te rete nan Logifem, lè yo disponib. Lwaye a reprezante 25% nan revni an e fanm yo kapab rete ladan li jiska twa lane. Ou dwe gen estati rezidan pèmanan oswa kòm sitwayen epi ou dwe reponn ak lòt kritè Biwo Minisipal Abitasyon an nan Montréal pou ou ka gen aksè ak li.

Pou tout kesyon

Pa ezite rele nou nan telefòn oswa pale ak youn nan entèvenan nou yo si ou bezwen presizyon oswa si ou genyen kesyon: 514-939-3172

Lòt resous itil

Men kèk nimewo ak sit wèb ki kapab itil ou.

Òganizasyon kominotè ki bay imigran yo èd

Men lis kèk resous kominotè k ap akonpaye imigran yo :